KONSELLU MINISTRU PRORROGA MANDATU COMITÉ ORIENTADOR 25 (CO25) BA TINAN LIMA

DILI, 28 Agostu 2026 (CO25)— Comité Orientadór 25 (CO25) apresia ba konfiansa husi Governu Konstitusionál da-IX liu husi Konsellu Ministru ne’ebé aprova ona projetu Rezolusaun Governu nian hodi prorroga mandatu CO25 ba períodu tinan lima tan, ne’ebé sei tama iha vigor hafoin mandatu atuál remata iha Janeiru tinan 2027.

Desizaun importante ne’e foti iha Reuniun Konsellu Ministru nian ne’ebé hala’o iha Palásiu Governu, Dili, iha kuarta-feira, 26 Agostu 2026. Prorrogasaun tempu servisu nian ne’e sai hanesan prova ba apoiu tomak husi Estadu ba misaun importante ne’ebé Komité hala’o hela.

Ba CO25, prorrogasaun mandatu ne’e nu’udar responsabilidade hodi garante kontinuidade servisu peskiza, inklui Responsabilidade Sientífika: atu sai nu’udar órgaun ofisiál ne’ebé prontu hatán, klarifika, no esklarese argumentu sientífiku sira, bainhira mosu krítika ka debate públiku ruma kona-ba konteúdu livru istória ne’ebé hakerek ona. Sosializasaun: sosializa rezultadu peskiza no matérias istória nian ba eskola sira no ba públiku iha munisípiu hotu. Dezenvolvimentu Arkivu CO25: Iha dokumentu-sira ho valór istóriku kona-ba Timor barak ne’ebé sei rai iha rai liur presiza transfere mai Timor; presiza dijitaliza, hodi asegura iha ita Timor. Dezenvolvimentu Literasia Istória: Sai parseiru ba Ministériu Edukasaun hodi dezenvolve programa literasia bazeia ba Istória Timor-Leste nian.

📌 Lee mós: REUNIAUN HAMUTUK HO MINISTRA EDUKASAUN, CO25 APREZENTA REZULTADU PESKIZA ISTÓRIA NO PLANU BA OIN

Avansu servisu peskiza CO25 nian ne’ebé la’o dadaun mak prosesu koleta fonte, dokumentu arkivu, no validasaun dadus istória tama ona ba faze finál. Livru volume IB imprimi ona, no iha ona esbosu final ba livru volume IIIA, no IIIB ne’ebé iha posibilidade bele ona publika iha tinan ne’e. Enkuantu livru Volume IA, volume II, IV no livri volume V tama ona ba faze final peskiza nian.

Bazeia ba Rezolusaun foun husi governu ne’e, despeza no kargu operasionál hotu ne’ebé mosu husi atividade CO25 nian sei bazeia ba rejime aplikavel ba konsesaun subvensaun públika nian, no sei hetan apoiu tomak husi verba ne’ebé inklui iha orsamentu anuál husi Ministériu Edukasaun nian.

Alende kontinua hakerek istória, CO25 mós kontinua hametin kooperasaun servisu entre instituisaun sira ne’ebé durante ne’e la’o tantu instituisaun relevante sira iha rai laran no mós instituisaun sira husi rai liur.

Pasu kolaborativu ne’e hein katak bele aselera rekolla dadus istória nian ne’ebé válidu, no mós bele garante katak valór sira husi istória nafatin moris no bele simu ho di’ak iha sosiedeade.

REMATA